न्यूजमधेश डेस्क
काठमाडौं ,२५ मंसिर।अध्यागमन विभागका कर्मचारीको सेटिङमा मानव तस्करहरूले हजारौँको सङ्ख्यामा बेरोजगार युवायुवतीलाई वैदेशिक रोजगारीमा पठाएका छन् । हात्तीछाप चप्पल लगाएर कोही पनि खाडी मुलुक घुम्न जाँदैन भन्ने सरकार र सरकारका कर्मचारीलाई जानकारी नभएको होइन, तर वैदेशिक रोजगार ऐन २०६४ र नियमावलीविपरीत दुई लाख पचास हजार लिएर मानव तस्करहरूले युवायुवती बेचिरहेका छन् । त्रिभुवन अन्तर्राष्ट्रिय विमानस्थल, अध्यागमनका कर्मचारीले ९० हजारदेखि माथि घुस लिएर सेटिङ मिलाइरहेका छन् ।
‘कोभिड १९’ का कारण आठ महिना अन्तर्राष्ट्रिय उडान ठप्प थियो । सरकारले हवाइसेवा कम्पनीहरूलाई यही मंसिर १ देखि अन्तर्राष्ट्रिय उडान भर्ने अनुमति प्रदान गरेदेखि यता मानव तस्करहरूले हजारौँको सङ्ख्यामा भिजिट भिजाको माध्यमबाट वैदेशिक रोजगारीमा नेपाली नागरिक पठाइसकेका छन् । उनीहरू अलपत्र परे, मृत्यु भयो, रोजगारी पाएनन् भने सरकारले उनीहरूको उद्दार गर्न कानुनतः मिल्दैन ।
वैदेशिक रोजगार विभागमा दर्ता कामय रहेका सयौँ म्यानपावर कम्पनी र ट्राभल्स एजेन्सीहरूले विमानस्थल, अध्यागमन विभागका कर्मचारीहरूसँगको मिलेमतोमा सेटिङ मिलाएर मानवतस्करी गरेका छन् ।
राज्यलाई थाहा हुँदाहुँदै मानव तस्करीजस्तो जघन्य अपराधमा राज्य र बिचौलियाको संलग्नता देखिन्छ । वैदेशिक रोजगार विभागमा दर्ता कायम रहेको ‘स्काइब्लु’ स्काइ अफ द वल्र्ड मल्टिपल ट्राभल्सका सञ्चालक दीपक राई, रामप्रसाद नेपाल, राईकै स्वामित्वमा रहेको मल्टिपल ट्राभल्स एण्ड टुर्सले दैनिक सय जनाको हाराहारीमा भिजिट भिजामा नेपाली कामदारलाई खाडीलगायतका मुलुकमा वैदेशिक रोजगारीमा पठाउँदै आएको छ । श्रोतका अनुसार राई र उनको म्यानपावर, ट्राभल्सलाई वैदेशिक रोजगार विभागले शंकाको घेरामा राखेको छ । राईले हेटौँडाका ज्ञानी लामा, सत्यदेवी लामा, शर्मिला लामा, अनु लामालगायतका कलिला महिला र गुल्मी मुसीकोटका सुवास परियारसमेतलाई भिजिट भिजामा वैदेशिक रोजगारीमा पठाउन लागेको श्रोतको दाबी छ ।
सुभम ओभरसिजका सोम बि.सी., सेन्ड फ्लाई टुर एण्ड ट्राभल्सकी सञ्चालिका पूजा नकर्मी र भैरबशम्सेर जवरा, वैदेशिक रोजगार विभागमा दर्ता कायम रहेको द.नं. ११८७/०७३/०७४ का सुनिल चुडाल, चुडालकै हेभव भ्याली ट्राभल्स एण्ड टुर्सले विमानस्थल सेटिङ गर्ने गरेको छ । सर्लाही ट्राभल्स र बोन म्यानपावरका सञ्चालक अजय चौधरीले अन्तर्राष्ट्रिय उडान शुरु भएयता हजारौँको सङ्ख्यामा भिजिट भिजामा नेपाली कामदारहरू पठाइसकेका छन् । चौधरी काठमाडौं प्रवेश गर्दा फाटेको चप्पलकै भरमा आएका थिए भन्ने चर्चा हालसम्म चलिरहेको छ । उनको धन्दालाई वैदेशिक रोजगार पत्रकार समाज नाम रहेको एक एनजीओले सघाउँदै आएको बुझिएको छ ।
वैदेशिक रोजगार विभागमा दर्ता कायम रहेको ९९५/०६७/०६८ फ्रन्टलाइ रिक्रुटमेन्ट प्रा.लि.का सञ्चालक सुरज के.सी.ले समेत भिजिट भिजामा कामदार पठाउने गरेका छन् । उनीसँग सूचना विभागको रातो प्रेस पास छ । यो त एउटा उदाहरण मात्रै हो । म्यानपावर बजारमा पत्रकारहरू बिक्री भइसकेका छन् । सयौँको सङ्ख्यामा यस्ता नक्कली पत्रकारहरू जन्माइएको छ, केवल एकछाक रोजीरोटीको लागि । सूचना विभाग र नेपाल पत्रकार महासङ्घसमेत यस्ता अनियमितता र पित पत्रकारिताबाट चोखो रहन सकेका छैनन् । अब अनुसन्धान कसले गर्छ ? के.सी.लाई अर्जुन नरसिंह के.सी.का छोरीज्वाइँ गगन थापा, केदार नरसिंह के.सी. बद्री नरसिंह के.सी.लगायतकाको संरक्षण रहेको बताइन्छ । यस्तै, मल्टिपल ट्राभल्स र स्काइब्ल्यु ‘स्काई अफ द वल्र्ड’का सञ्चालक दीपक राईले आफूलाई नेपालकै एक नम्बर पत्रकार दाबी गर्ने कथित ‘चर्चित पत्रकार’को नाम पटक–पटक लिएका छन् ।
अर्कोतर्फ राज्यको उच्च ओहोदा सम्लाहेका वा सम्हालिसकेका, बहालवाला तथा अवकाशप्राप्त नेपाली सेना, नेपाल प्रहरी, सशस्त्र प्रहरी र निजामती कर्मचारहरूको म्यानपावर कम्पनीहरूमा ठूलो लगानी रहेको छ, जुन नहुनुपर्ने थियो । म्यानपावर कम्पनीहरूमा सेक्युरिटी गार्डको डिमाण्ड आउनेवित्तिकै नेपाली सेना र प्रहरीको जागिर बीचमै छाडेर म्यानपावर धाउने सेना र प्रहरीका बहालवाला र अवकाशप्राप्त जवानहरूको ओइरो नै लाग्ने गर्छ । हुँदाखाँदाको जागिर छाडेर धेरै पैसा कमाउने लोभ देखाउने आफ्नो कमाण्ड र बटालियनमा नेतृत्व गरेका अवकाश प्राप्त उच्च तहका व्यक्तिहरू म्यानपावर कम्पनीका सम्पर्क सुत्रहरू हुन् । राज्यलाई मात्रै हैन स्वयम् रोजगारीमा जाने कर्मठ जवानहरूको रगत र पसिना मातृभुमिमा नभइ विदेशीको भूमिमा बग्ने गरेको छ ।
विभागले एसओएस, डीडी ह्युमन रिसोर्स र होप इन्टरनेशनललाई यसभन्दा पहिले छापा मारेको छ भने गत साता सुर्खेतमा सिल गरेको छ । यस्तै, इम्पावर, स्काइ अफ द वल्र्डमा छापा मारेको श्रोतले जानकारी दिएको छ । मानव तस्करीजस्तो सम्वेदनशील विषयमा अदालतले म्यानपावरे वकिलको भन्दा वैदेशिक रोजगारीमा जाने निरीह, गरिब नागरिकको पक्षमा उभिनुपर्ने जनस्तरबाट आवाज उठेको छ ।-घटना विचार
