न्यूजमधेश डेस्क
काठमाडौं,६ पुस। उखुको भुक्तानी माग्दै काठमाडौं आएका किसानहरूले सोमबार पनि माइतीघर मण्डलमा प्रदर्शन जारी राखेका छन् । सरकारले उखु मिल सञ्चालकबाट रकम दिलाइदिने जिम्मेवारी नलिएसम्म आन्दोलन नरोक्ने उनीहरूले बताएका छन् ।
सरकारसँग सोमबार दिउँसो छलफल हुन लागेको जनाउँदै किसानहरूले उखुको बक्यौता रकम भुक्तानी दिलाइदिने जिम्मेवारी लिन सरकारलाई आग्रह गर्ने बताएका छन् ।
चिनी मिल सञ्चालक र सरकारले पटक–पटक झूटो आश्वासन दिएकाले यसपटक सरकारले मिति तोकेर भुक्तानीको जिम्मा लिए आन्दोलनको स्वरूप फेर्न सकिने उनीहरूको भनाइ छ ।
‘किसानको खातामा पैसा नआउँदासम्म सरकारको भनाइमा ढुक्क हुन सकिँदैन,’ उखु किसान संघर्ष समितिका सचिव गोपाल यादव न्युज एजेन्सी नेपालसँग भने, ‘सरकारले मिति तोकेर भुक्तानी दिलाइदिने जिम्मेवारी लिए आन्दोलनको स्वरूप परिवर्तन गर्न सकिन्छ ।’
