न्यूजमधेश डेस्क
काठमाडौं ,२७ पुस।रामजी रामलाई एमबीबीएस अन्तिम वर्षको परीक्षामा सामेल गराउन चिकित्सा शिक्षा अयोगले निर्देशन दिएको छ । आयोगले त्रिभुवन विश्वविद्यालय चिकित्साशास्त्र अध्ययन संस्थानलाई पत्र पठाउँदै रामजीलाई परीक्षामा सामेल गराउन निर्देशन दिएको हो ।
रामजी रामको सम्पूर्ण शिक्षण शुल्क विश्वविद्यालय अनुदान आयोगले तिरिसकेको हुँदा उनलाई परीक्षामा सामेल गराउन आयोगकाे निर्देशन छ ।
शुल्क नतिरेको भन्दै वीरगन्जस्थित नेसलन मेडिकल कलेजले एमबीबीएस चौथो वर्षको परीक्षा हलबाट रामजी रामलाई बाहिर निकालेको थियो ।
दलित कोटाको छात्रवृत्तिमार्फत एमबीबीएस अध्ययनरत रामजी रामले कलेजलाई विभिन्न शुल्कका नाममा ८ लाख ११ हजार ५ सय रुपैयाँ बुझाइसकेका छन् । त्यो पैसा पनि उनले चन्दा मागेर जुटाएका हुन् । ८ लाख रुपैयाँ तिरिसक्दा पनि कलेजले अन्य शुल्क भन्दै उनीसँग थप ७ लाख ५० हजार रुपैयाँ मागेको छ ।
२०७५ सालमै शिक्षा मन्त्रालयका उपसचिव नेतृत्वको टोलीले छात्रवृत्तिमा अध्ययनरत विद्यार्थीले छात्रावास र मेसबाहेक अन्य शुल्क तिर्नुनपर्ने निर्णय गरिसकेको छ । उपसचिव नेतृत्वको टोलीले गरेको निर्णयअनुसार ’शुल्कसम्बन्धमा नेपाल सरकारले हालसम्म भएका निर्णय र कार्याविधिमा प्रस्ट उल्लेख भएबमोजिम कलेजले माग गरेबमोजिम अतिरिक्त मेस तथा छात्रावासबाहेक थप शुल्क लिन पाउने स्थिति रहँदैन ।’
५ भदौ, २०७५ को मन्त्रिपरिषद् बैठकले मेडिकल कलेजले परीक्षा, भर्ना, काउन्सिल, प्रयोगशाला, पुस्तकालय आदिको शुल्क लिन नपाइने निर्णय गरेको थियो ।
चार पुस्तापछि बल्वावासीलाई लालपुर्जा
बलात्कार रोक्न सामाजिक अनुसन्धान