न्यूजमधेश डेस्क
काठमाडौं ,२ माघ। मुलुकको संघीय राजधानी काठमाडौंसहित तराईंका जिल्लाहरुमा बाक्लो कुहिरो र हुस्सु लागेको छ । देशका अधिकांश स्थानमा बादल लागेसँगै ‘भिजिबिलिटी’ घट्दा आन्तरिक उडानसमेत प्रभावित बनेको छ ।
मौसममा आएको खराबीका कारण विराटनगर, जनकपुर, भैरहवा, नेपालगञ्ज र धनगढीलगायतका विमानस्थलमा आन्तरिक तर्फका सबै उडान प्रभावित बनेको त्रिभुवन अन्तर्राष्ट्रिय विमानस्थल कार्यालयले जनाएको छ ।
मौसम विज्ञान विभागले बिहान तराईका भू-भागहरुमा बाक्लो कुहिरो लागेको र काठमाडौं उपत्यकासहितका पश्चिम पहाडी जिल्लामा बादल लागेको जनाएको छ । विभागका अनुसार काठमाडौंमा बिहानको जस्तै अवस्था दिउँसोसम्म कायम रहनेछ ।
हाल नेपालमा दक्षिण पूर्वी अरब सागरमा बनेको न्युन चापीय क्षेत्र तथा पूर्वी बिहारमा बनेको न्युन चापीय क्षेत्रको प्रभाव बढेकाे मौसम पूर्वानुमान महाशाखाले जनाएकाे छ । यही कारण प्रदेश नम्बर १, सुदूरपश्चिम, कर्णाली र गण्डकी प्रदेशका धेरै भू-भागमा आंशिकदेखि सामान्य बदलीको अवस्था छ । बाँकी भू-भागमा सामान्य बदलीको अवस्था छ ।
सुदूरपश्चिम प्रदेश र कर्णाली प्रदेशका उच्च भू-भागका एक/दुई स्थानमा हल्का हिमपात र प्रदेश नम्बर १ का एक/दुई स्थानमा हल्का वर्षाको सम्भावना देखिएकाे छ ।
त्यस्तै, तराईंका धेरैजसो स्थानमा बिहानको समयमा बाक्लो हुस्सु र कुहिरो लाग्ने भएकाले चिसो बढ्ने विभागले पुर्वानुमान गरेकाे छ । चिसोबाट बच्न आवश्यक सतर्कता अपनाउन पनि विभागको अनुरोध छ ।
