न्यूजमधेश डेस्क
बारा,२० जेष्ठ । प्रदेश २ का बारा जिल्लाको पथलैया स्थित व्यस्त चोकको सडकमा रहने दर्जनौ छाडा चौपायालाई व्यवस्थापन गर्न ट्राफिक प्रहरी र स्थानीय सरकारले लापरवाही गर्दा दैनिक सडक दुर्घटना र जोखिम व्यापक बनेको छ ।
स्थानीयले छाडा छोडेको चौपायाका कारण व्यस्त सडक जाम हुने, साना सवारी दुर्घटना पर्ने, मानवीय क्षति भैरहदा समेत बेवास्था गरिए पछि ट्राफिक प्रहरी र स्थानीय सरकारको लापरवााही प्रष्ट देखीएको हो ।
दुर्घटनाको कारण बनेको छाडा पशु चौपाया नियन्त्रण गर्न स्थानीय बासिन्दाले जितपुर सिमरा उपमहानगरलाई दबाब दिदा छाडा चौपाया व्यवस्थापन गर्न बनाएको कान्जि हाउस प्रयोगविहिन र खण्डहर बनेको छ ।
छाडा चौपायासंग ठक्कर खादा यस आर्थिक बर्षमा मोटरसाईकल र साना गाडी ३७ वटा दुर्घटनामा भइसकेका छन् ।
जस्मा २ जनाको ज्यान गएको र १७ जना घाईते भएको ट्राफिक प्रहरीको तथ्यांकमा उल्लेख छ ।
ट्राफिक प्रहरीले आफूहरुको काम सडक व्यवस्थापन र दुर्घटना न्युनिकरण भए पनि छाडा चौपाया नियन्त्रण गर्न स्थानीय सरकारले चासो नदिँदा दुर्घटना बढेको जनाएको छ ।
उपमहानगरका वडाअध्यक्ष हिरा बहादुर गुरुङ्गले कान्जी हाउस ब्यबस्थापन गर्न दुई बर्ष पहिले नै माग गरिएको र प्रत्येक पटक आग्रह गरे पनि मेयरले आलटाल गर्दा यो स्थिती आएको बताउनुभयो ।
