न्यूजमधेश डेस्क
धरान ,२५ असोज। मंसिर ४ गते हुने प्रदेश सभा सदस्य पदमा सुनसरी क्षेत्र नम्बर-१ (ख) मा दाजुभाईबीच चुनाबी प्रतिस्पर्धा हुने भएको छ। यस क्षेत्रमा सत्ता गठबन्धनको तर्फबाट नेकपा एस पार्टीका धरान अध्यक्ष रेवतरमण राई र एमाले-जसपा गठबन्धनबाट एमालेका प्रदेश सचिवालय सदस्य विजय राई चुनावी प्रतिस्पर्धामा उत्रिएका छन्।
चुनाव अगाडि एक अर्कालाइ सहयोग गर्ने आश्वासन दिँदै आएका यी दाजुभाइलाई पार्टीले टिकट दिएपछि मतदाताको घरदैलोमा भोट माग्न ब्यस्त छन्। नेकपा एसका रेवात र एमालेका विजय आफ्नै काका बढाउका छोराहरु हुन्। रेवत माइलो भाईको छोरा हुन् भने विजय कान्छो भाइका छोरा हुन्।
पार्टीले टिकट दिएपछि दाजुभाइभन्दा पनि पार्टी र सिद्धान्तलाई माथि राखेर आफू चुनावी मैदानमा उत्रिएको नेकपा एसका रेवतले बताए। भाइ विजयको भन्दा सत्ता गठबन्धनको आफूलाई समर्थन रहेका कारण आफ्नो जित सुनिश्चित भएको उनको दाबी छ।
यता विजयले पनि दाजुभाई भन्दा पनि पार्टी नै माथि भएको बताएका छन्। उनले पनि आफूलाई जसपाको समर्थन रहेकाले दाई रेवतलाई पराजित गर्न सहज हुने दाबी गरेका छन्।
