श्रवण देव
जनकपुरधाम,३१ चैत । प्रदेश २ को अस्थायी राजधानी जनकपुरधामस्थित मधेश भवनभित्र आकर्षक टेन्ट लगाइएको छ । टेन्टभित्र रातो कार्पेटमा मन्त्री, नेतादेखि कार्यकर्ता हिंडिरहेका छन् । नयाँ वर्षको शुभकामना आदान प्रदान गर्दै उनीहरु मीठा मीठा परिकारको स्वाद लिइरहेका छन् ।
यही टेन्टबाहिर २० जना भन्दा बढी मानिसहरु नारा लगाइरहेका छन्, ‘हाम्रो माग पूरा गर, वीर शहीद अमर रहुन् ।’
मंगलबार प्रदेश २ को भौतिक पूर्वाधार विकास मन्त्रालयले नयाँ वर्ष २०७८ तथा सिरुवा पर्वको अवसर पारेर शुभकामना आदानप्रदान तथा चियापान कार्यक्रम राखेको थियो । कार्यक्रममा प्रदेशका केही मन्त्रीका साथै जनता समाजवादी पार्टी ९जसपा० का अध्यक्ष महन्थ ठाकुर, वरिष्ठ नेता राजेन्द्र महतो, नेता शरदसिंह भण्डारी पनि उपस्थित भए ।
पार्टीका अन्य नेतारकार्यकर्तासहित अन्य क्षेत्रका व्यक्ति पनि उक्त कार्यक्रममा आमन्त्रित थिए ।
टेन्टभित्र मन्त्री, नेतारकार्यकर्ता हर्षित मुद्रामा शुभकामना आदानप्रदान गरिरहँदा बाहिर विरोध प्रदर्शन गरिरहने समूह थिए मधेश आन्दोलनका शहीदका परिवार । जसले केन्द्र र प्रदेश सरकारबाट आफूहरुको माग पूरा हुने आश्वासन मात्र पाएका थिए । मंगलबार पनि टेन्टभित्र रहेका मधेशका नेता र प्रदेश सरकारका मन्त्रीसँग शहीद परिवारको भेट भएन ।
एक शहीद परिवारलाई एक रोजगार उपलब्ध गराउने प्रदेश सरकारले प्रतिबद्धता जनाए पनि पूरा नगरेको गुनासो शहीद परिवारको छ । ‘धेरैलाई जागिरै दिइएको छैन’ शहीद परिवार तथा आन्दोलनमा घाइते भएका परिवारको हकहित संरक्षणका लागि गठन भएको समितिका संयोजक रामनरेश राय यादवले भने, ‘जागिर दिएकाहरुलाई पनि करारमा नियुक्त गरिएको छ ।’
उनका अनुसार प्रदेश सरकारले ५४ जनालाई नियुक्ति पत्र वितरण गरेपनि २८ जनाले जागिर पाएका छैनन् । यसबाहेक प्रदेश सरकारले मधेशी शहीद स्मृति प्रतिष्ठान गठन गर्ने प्रतिवद्धता जनाए पनि गरेको छैन ।
२०६३ सालको मधेश आन्दोलनमा पति गुमाएकी सर्लाहीकी सुमित्रा यादवले स्थानीय नेतादेखि मन्त्रीसम्मले पटक–पटक आश्वासनबाहेक केही नदिएको बताइन् ।
‘शहीदकै बलिदानीमा मस्ती’
५ माघमा जनकपुरधाममा मधेशी शहीद दिवस मनाउने क्रममा पनि शहीदका परिवारले धर्ना दिएका थिए । त्यस बेला प्रदेश सरकारले माग पूरा गर्ने आश्वासन दिएको थियो । तर धेरै पटक दिएको आश्वासन पूरा नगरेको मंगलबार आएका शहीद परिवारले गुनासो गरे ।
‘शहीदकै बलमा यो सरकार बनेको छ । तर, शहीदकै परिवारमाथि कुनै चासो नदिई नेता र मन्त्रीहरु मस्ती गरिरहेका छन्’ समितिका संयोजक यादवले भने, ‘योभन्दा ठूलो बिडम्बना के नै हुन सक्छ ।’
शहीदका परिवार बाहिर नारा लगाइरहनु र शहीदकै बलमा सत्तामा पुगेकाहरु रमाइरहनुले आफूहरुलाई दुःखित तुल्याएको उनले बताए । ‘उनीहरु भित्र खानपिन र कुराकानीमा यति व्यस्त भए कि हामीलाई सान्त्वना समेत दिन आएनन्’ उनले दुःखेसो पोखे ।
शुभकामना आदानप्रदान कार्यक्रममा रहेका जसपाका वरिष्ठ नेता राजेन्द्र महतोलाई शहीद परिवारको समस्याबारेमा जिज्ञासा राख्दा उनले शहीद परिवारको माग प्रदेश सरकारले सम्बोधन गर्नुपर्ने बताए ।
‘प्रदेश सरकारले सम्भव भएअनुसार सहानुभूतिका साथ व्यवहार गर्नुपर्छ’ उनले भने, ‘तिनीहरुको बालबच्चाको भरणपोषणको काम सरकारले गर्नुपर्छ ।’
