जनकपुरधाम, ९ माघ । डा. सि. के राउत नेतृत्वको जनमत पार्टीले आज (आइतवार) नाङ्लो जुलुस प्रदर्शन गर्ने भएको छ । किसानहरुको मागलाई नेपाल सरकारले हालसम्म बेवास्ता गर्नुका साथै आन्दोलनमाथि दमन गर्न खोजेकाले आन्दोलनलाई निरन्तरता दिएकाे हाे ।
पार्टीले किसानहरुको विभिन्न माग राख्दै निरन्तर प्रदर्शन गर्दै आएका छन् । पार्टीले आह्वान गरे अनुसार स्थानियतहमा हिजो (शनिवार) समेत किसानहरुले बाल्टिन लिएर जुलुस प्रदर्शन गरिएकोे थियो ।
समयमा मलखाद्य र सिचाईको उचित व्यवस्था, उखु किसानको भुक्तानी, किसान कार्डको व्यवस्था, किसानमाथिको दमन बन्द गर्नु पर्ने, किसानमाथि लगाइएको झुठा मुदा खारेज गर्नुपर्ने, फसलको उचित मुल्य निर्धारण गर लगायतका नाराहरुसहित प्रदर्शनमा उत्रिएको थियो । कोरोना भाइरसको संक्रमण बढदै गएकोले भौतिक दुरी तथा मास्कको प्रयोग गरी कार्यक्रम गराउने पार्टीले निर्देशन दिएको छ । स्थानीय प्रशासनले तोकेको मापदण्ड पालना गर्न समेत पार्टीले आग्रह गरेका छन् । गत पुस ३० गते विभिन्न जिल्लाको सदरमुकाममा समेत किसान महार्याली प्रदर्शन गरिएको थियो ।
