जनकपुरधाम । मधेश प्रदेशसभाको बैठक शुक्रबार सुरु हुन नपाउँदै स्थगित भएको छ ।
प्रदेश सरकारले सार्वजनिक गरेको बजेटमा प्राविधिक त्रुटि भएको स्वयं सरकार पक्षले स्वीकार गरिसकेको उल्लेख गर्दै प्रतिपक्षी दलहरुले संशोधन नभएसम्म त्यस उपर छलफल गर्न नसकिने अडान लिएका छन् । शुक्रबार साढे दुई बजे सुरु भएको बैठक सभामुख रामचन्द्र मण्डलले कार्यसूचिमा प्रवेशको चर्चा गर्ने बित्तिकै विपक्षी दलका सांसदहरुले बैठक अवरुद्ध गरेका हुन् ।
प्रतिपक्षी भूमिकामा रहेका चार दलले राखेको तीन बुँदे मागलाई सम्बोधन नगरिए बजेट सम्बन्धी कुनै पनि विषयमा छलफल अगाडी बढ्न नसक्ने लोसपाकी सांसद रानी तिवारीले बताइन् । त्यसको बावजुद सभामुखले कार्यसूचि अनुसार बैठकको कारवाही अगाडि बढाउन खोजेपनि प्रतिपक्षी सांसदहरुले आसन ग्रहण नगरेपछि १० मिनेटको लागि भन्दै स्थगित गरिएको छ ।
अगामी आर्थिक वर्षको बजेट उपर छलफल गर्न आह्वान गरिएको बैठक अवरुद्ध भएपछि सभामुख मण्डलको पहलमा निकासका लागि सर्वदलीय छलफल सुरु भएको छ ।
