न्यूजमधेश सम्बादाता
जीतपुर,८ चैत्र । प्रदेश नम्बर २ प्रदेश ट्राफिक कार्यालय पथलैयाले शुक्रबारबाट लामो दुरीका सार्वजनिक सवारी साधनहरुमा टाईम कार्ड लागु गरेको छ ।
यस प्रदेशका ८ ओटै जिल्लाबाट शुरु गरीएको यस अभियानको क्रममा चालकलाई सार्वजनिक सवारी साधनमा डस्टबिन र आगो नियन्त्रक साधन अनिवार्य राख्नुका साथै चालक ज्याकेट लगाउन चालकहरुलाई अभिप्रेरित गरिने प्रहरी उपरिक्षक महतोले जानकारी दिए ।
‘सडक सुरक्षा सचेतना अभियान’ अन्तरगत प्रदेश नम्बर २ प्रदेश ट्राफिक कार्यालय पथलैयाले यो अभियानको शुरुवात गरेको हो ।
अभियानको अन्तरगत प्रदेश ट्राफिक कार्यालय पथलैयाले आज लामो दुरीका सवारी साधनहरुलाई निशुल्क रुपमा टाईक कार्ड बितरण गरेको छ । दुरीका अनुसार प्रत्येक ट्राफिक चेक प्वाईन्टलाई ध्यानमा राखेर टाईमकार्डमा समय निर्धारण गरीएको छ ।
प्रदेश नम्बर २ दुर्घटनाको उच्च जोखिम भएको प्रदेशको रुपमा रहेकोले यस दरलाई न्युनिकरण गर्ने उद्धेश्य सहित ‘सडक सुरक्षा सचेतना अभियान’ अभियानको रुपमा टाईम कार्ड लागु गरेको प्रदेश नम्बर २ प्रदेश ट्राफिक प्रहरी कार्यालय पथलैयाका ट्राफिक प्रहरी उपरिक्षक श्याम कुमार महतोले जानकारी दिए ।
प्रदेश नम्बर २ प्रदेश ट्राफिक कार्यालय पथलैयाले यस आर्थिक वर्षको फाल्गुन सम्ममा ७ सय ४६ ओटा सवारी दुर्घटनामा ३ सय २३ ओटाको मृत्यु भएको जनाएको छ ।
