न्यूजमधेश सम्बादाता
राजविराज ,४ बैशाख । सप्तरीमा ¥यापिड टेस्टमा पोजेटिभ देखिएका दुई व्यक्तिको पिसिआर रिपोर्टमा कोरोना नेगेटिभ देखिएको छ ।
दिल्लीबाट फर्केर आफ्नो घरमा बसिरहेका यी दुईसहित आठ जनालाई प्रहरीको टोलीले मंगलबार राजविराजस्थित गजेन्द्रनारायण सिंह अस्पताल ल्याएर ¥यापिड परीक्षण गराएको थियो । दुई जनाको पोजेटिभ र ५ जनाको नेगेटिभ रिपोर्ट आएको थियो ।
पोजेटिभ र नेगेटिभ दुबै रिपोर्ट आएका सातै जनाको स्वाब संकलनका लागि पिसिआर परीक्षण गर्न मंगलबारै साँझ बि.पि. कोइराला स्वास्थ्य बिज्ञान प्रतिष्ठान धरान पठाइएको थियो । त्यहाँ पिसिआर परीक्षण गर्दा सातै जनाको रिपोर्ट नेगेटिभ आएको जिल्ला स्वास्थ्य कार्यालय, सप्तरीका निमित्त प्रमुख दुनियाँलाल यादवले जानकारी दिए ।
दिल्लीबाट आएर आफ्नो घरमा बसेको सूचना पाएपछि प्रहरीको टोलीले खड्क र राजविराज नगरपालिका, तिलाठी–कोइलाडी, अग्निसाइर कृष्णासावरण गाउँपालिकाका उनीहरुलाई अस्पताल ल्याएर ¥यापिड जाँच गराइएको थियो ।
दुई जना जमातिमा ¥यापिड परीक्षणका क्रममा कोरोना पोजेटिभ देखिएपछि सप्तरीका दुई स्थानीय तहका दुई वडालाई सिल समेत गर्ने निर्णय गरिसकिएको छ ।
बुधबार बिहान बसेको जिल्ला सुरक्षा समितिको बैठकले खड्क नगरपालिकाको वडा नम्बर ११ र तिलाठी कोइलाडी गाउँपालिकाको वडा नम्बर १ लाई सिल गर्ने निर्णय गरेको थियो ।
