न्यूजमधेश सम्बादाता
जनकपुरधाम,११ जेठ । धनुषा प्रहरीले जिल्लाको बिभिन्न ठाउँबाट भारतबाट ल्याइएका गुटखासहितका बिभिन्न सामग्री नियन्त्रणमा लिई भन्सार कार्यालयमा बुझाएको छ ।
धनौजी गाउँपालिका ४ मुसहरी टोलबाट प्रहरीले भारतबाट नेपाल तर्फ आउदै गरेको ज ७ प ४०६१ नम्बरको मोटरसाइकललाई चेकजाँच गर्दा ४० हजारमूल्य बराबरको राजनिवास १ सय पोका, १० हजार मूल्य बराबरको पान परागको पत्ती १ सय पोका, ३ हजार मूल्य बराबरको २५ बोतल खाने तेल बरामद भएको प्रहरीले जनाएको छ ।
भन्सार छलेर ल्याउँदै गरिएको सामान बरामद भएपछि सामान, मोटरसाइकल र मोटरसाइकलमा सबार धनौजी गाउँपालिकाका १८ बर्षीय राकेश यादवलाई समेत आवश्यक कार्वाहीका लागि जनकपुर भन्सार कार्यालयमा पठाईएको धनुषा प्रहरीले जनाएको छ ।
यस्तै, जनकपुरधाम ७ कटैयाचौरीबाट पनि प्रहरीले राजनिवास गुटखा बरामद गरेको छ । जनकपुरतर्फ आउँदै गरेको ज ६ प ६०९७ नम्बरको मोटरसाइकललाई रोकेर चेकजाँच गर्ने क्रममा २५ पोका उक्त गुटखा फेला परेको प्रहरीले जनाएको छ ।
२५ हजार मूल्य बराबरको उक्त गुटखा, मोटरसाइकल र मोटरसाइकलमा सबार महोत्तरीको जलेश्वर नगरपालिका ११ बस्ने ३४ बर्षीय जितेन्द्र कुमार साह समेतलाई नियन्त्रणमा लिई जनकपुर भन्सार कार्यालयमा पठाईएको प्रहरीको भनाई छ ।
जनकपुरधाम ४ बाट भने वेवारिसे अवस्थामा ८५ पोका राजनिवास १ कार्टुन लहठी र १ बोरा मेसिनरी पार्ट फेला पारी आवश्यक कार्वाहीका लागि भन्सार कार्यालयमा पठाईएको जिल्ला प्रहरी कार्यालय, धनुषाले जनाएको छ ।
