न्यूजमधेश सम्बादाता
जनकपुरधाम,१५ जेठ।कोरोना संक्रमणबाट जोगिन जारी लक डाउनमा आफ्नो घर खोजेका धनुषाका एक युवकलाई मृत्युवरण गर्नुपरेको छ । घर नआउँदै उनको मृत्यु भएको छ ।
चार महिनाअघि मात्रै रोजगारी गर्न भारतको गुजरात गएका शहीद नगरपालिका वडा नम्बर ९ का युवक आफ्नो घर आउनै लाग्दा जटही सीमामा प्राण त्यागेका छन् । लामो समयदेखि भोकको सामना गरेका उनले बुधबार बिहान जटही सीमामै प्राण त्यागे ।
यसरी ज्यान गुमाउनेमा बिरेन्द्र गुरमैता यादव छन् । झण्डै महिना दिनदेखि च्यूरा र भुजा मात्रै खान बाध्य भएका थिए उनी ।
उनीसहित झण्डै २ सय जना भारतबाट आएर जटही नाकामा जम्मा भएका थिए । यहीं भींडकाबीच बेहोस भएपछि ३० बर्षीय गुरमैताले आफ्ना परिवारलाई चाँडो आइदिन फोन गरेका थिए । उनको फोन आएलगत्तै उनका भाई धिरेन्द्रसहित परिवारका ४ जना राति दुई घण्टा लगाएर एम्बुलेन्स खोजेका थिए ।
‘एम्बुलेन्स लिई राति१ बजे जटही पुग्यौं’ मृतकका भाई धिरेन्द्रले भने, “तर रातभरि एम्बुलेन्सलाई दाजुभएतिर छिर्न दिइएन् ।”
आफूहरु पैदलै गएर दाजुलाई लिन जाने बताएपनि जान नदिएको उनले बताए । रातभरि दाजु नजिक गएर ल्याउने प्रयास गरेपनि जान नदिँदा दाजुको मृत्यु भएको उनले बताए ।
रोजगारी गर्न भारतको गुजरात गएको केहि दिनमै उनी लकडाउनको शिकार भए । लकडाउन भएपछि उनी त्यहाँ भोकभोकै बस्न थाल्दा आफ्नो घर आउन खोजेका थिए । उनी १७ दिनअघि गुजरातबाट नेपालका लागि हिंडेको उनको परिवारजनले बताएका छन् ।
घर आउने क्रममा बाटोमा उनले सुख्खा खानेकुरा मात्रै भएको र खाना कतै खान नपाउँदा बेहोस भएको परिवारजनको भनाई छ ।
बेहोस भएका उनलाई उपचारका लागि एम्बुलेन्स लिएर गएपनि ल्याउन नसकिएको परिवारजनले बताएका छन् ।
मृतकको शवलाई नेपाली सेनाको टोलीले प्रादेशिक अस्पताल जनकपुरधाम ल्याएको छ । ल्याउनेवित्तिकै उनको स्वाब संकलन गरिएको छ ।
उनको मृत्यु भएपछि सीमामा भारततर्फ जम्मा भएकाहरु आक्रोसित हुँँदै नेपालतर्फ ढुँगामुडा गरेका छन् । ढुँगामुडाबाट ज.१त १२१३ नम्बरको एम्बुलेन्समा समेत क्षति पुगेको छ ।
जटही नाकामा मंगलबार राति २ सयभन्दा बढी संख्यामा नेपालीहरु घर आउन जम्मा भएका थिए । सुरक्षाकर्मीले उनीहरुलाई रोकेर राखेका थिए । तर बिरेन्द्रको मृत्यु भएपछि उनीहरु आक्रोशित हुँदै नेपालतर्फ ढुँगामुडा समेत गरेका थिए । उनीहरुले प्रधानमन्त्री केपी शर्मा ओलीबिरुद्व नाराबाजी समेत गरेका थिए ।
त्यहीं नाराबाजीका कारण अधिकांस व्यक्ति आ–आफ्ना घरतिर लागेका थिए ।
