न्यूजमधेश डेस्क
जनकपुरधाम,१७ असार । सात बर्षपछि अंगीकृत नागरिकता दिन लागिएको प्रावधानबिरुद्वको आन्दोलन चर्किदैं गएको छ । मंगलबार प्रदेश २ का सबै जिल्लासहित संघीय राजधानी काठमाडौंमा पनि प्रदर्शन भएको छ ।
प्रदेश २ को आठ वटै जिल्लामा जनता समाजवादी पार्टीद्वारा बिरोध प्रदर्शन गरिएको छ । अस्थायी राजधानी जनकपुरधामसहित जिल्लामा यी पार्टीका नेता÷कार्यकर्ताको उल्लेख्य सहभागिता थियो ।
तत्कालिन समाजवादी र तत्कालिन राष्ट्रिय जनता पार्टी (राजपा) बीच एकीकरण भएपछि पहिलो पटक मंगलबार यी पार्टीका नेता÷कार्यकर्ता एक भएर सशक्त आन्दोलनमा लागेका हुन् ।
जनकपुरधाममा प्रदेशका मन्त्री र सांसदले समेत सहभागिता जनाएका छन् । जनकपुरधाम र राजविराजमा भएको प्रदर्शनमा प्रदेशका मन्त्रीहरु सहभागिता भएका छन् ।
जनकपुरधाममा गरिएको प्रदर्शनमा ३ जना मन्त्रीले सहभागिता जनाएका छन् । भौतिक पूर्वाधार तथा विकास मन्त्री जितेन्द्र सोनल, आन्तरिक मामिला तथा कानुन मन्त्री ज्ञानेन्द्र यादव र भूमी, व्यवस्था कृषि तथता सहकारी मन्त्री शैलेन्द्र साह प्रदर्शनमा सहभागी भए ।
स्थानीय जनक चोकबाट निकालिएको बिरोध ¥याली जनकपुरधामको बिभिन्न भाग परिक्रमा गर्दै जनक चोकमा आई केहि बेर धर्ना दिएर कोण सभामा परिणत भएको थियो । प्रदर्शनमा सहभागी भएका मन्त्री भने धर्ना दिएर गएका थिए ।
कोणसभामा संघीय सांसद उमाशंकर अरगरिया, प्रदेश सांसद रामाशिष यादव, परमेश्वर साह, जनकपुरधाम उप महानगरपालिकाका प्रमुख लालकिशोर साहसहितकाले मन्तव्य दिदैं ७ बर्षे प्रावधानसहितको नागरिकता विधेयक नसच्चयाएसम्म आन्दोलन जारी रहने बताए ।
प्रदेशका सामाजिक विकास मन्त्री नवलकिशोर साह आफ्नो गृह जिल्ला सप्तरीमा आयोजित प्रदर्शनमा सहभागिता जनाएका छन् ।
सदरमुकाम राजविराजमा जनता समाजवादी पार्टीद्वारा निकालिएको बिरोधमा सहभागिता जनाउँदै मन्त्री साहले स्थानीय जनआन्दोलन चोकमा आयोजित कोणसभामा भाषण समेत दिएका छन् । कोणसभामा बोल्दै मन्त्री साहले नागरिकता विधेयक नसचिएसम्म आन्दोलन जारी रहने बताए ।
