न्यूजमधेश डेस्क
सप्तरी ,५ भदौ । राजविराज नगरपालिकाका पूर्वउपप्रधानपञ्च मुरारी उपाध्यायको ७६ वर्षका उमेरमा आज निधन भएको छ ।
नेपाली काँग्रेस सप्तरीका पूर्वक्षेत्रीय सभापतिसमेत रहनु भएका उपाध्यायको उपचारका क्रममा काठमाडौंँको ग्राण्डी हस्पिटलमा मृत्यु भएको उहाँको परिवारका सदस्यले जनाएका छन् ।
बिद्यार्थीकालदेखि नै राजनीतिमा सक्रिय उपाध्याय विसं २०४४ वैशाखमा भएको निर्वाचनमा राजविराजको उपप्रधानपञ्चमा निर्वाचित हुनुभएको थियो ।
विसं २०४३ साल चैतमा भएको निर्वाचनमा राजविराजका चार वडामा धाँधली भएको जनाउँदै अनशनलगायत आन्दोलन सफल भएपछि २०४४ वैशाखमा राजविराजका सबै वडामा पुनःनिर्वाचन भएको थियो ।
बिरामीको सेवा र अस्पतालमा कुरुवा बस्न अन्तिम समयसम्म अग्रसर रहने उपाध्याय निडर, क्रान्तिकारी र सामाजिक व्यक्तित्व भएको उहाँसँगै प्रधानपञ्च बन्नुभएका गोविन्द सिंहले बताउनुभयो ।
ज्वरो र निमोनिया भएपछि एक साताअघि उपचारका लागि उहाँ काठमाडौंँ जानुभएको थियो । उपाध्यायका श्रीमती, दुई छोरा र ३ छोरी छन् ।
