मनोज बनैता, लहान । सिरहाको दक्षिणवर्ती सखुवानन्कारकट्टी गाउँपालिका ३ स्थित पोर्ताहा स्कुलमा स्थानियले तालाबन्दी गरेका छन । पोर्ताहा मा.वि.को प्रशासनमा असन्तुष्ट विद्यालय व्यवस्थापन समिति सदस्यलगायत स्थानीय अभिभावकले सोमबार दिउँसो तालाबन्दी गरेका छन् ।
विद्यालयमा उमेर हद नाघिसकेका व्यक्तिलाई कागजी कीर्ते गरी लेखापाल नियुक्त गरिएको भन्दै बिरोध स्वरुप तालाबन्दी गरेको हो । भगवानपुर गाउँपालिका २ नहरारिगौल घर भएका जागेश्वर सिंहलाई उमेर हद नाघेपनि नियुक्ति दिएको दावी असन्तुष्ट पक्षको छ । विद्यालय व्यवस्थापन समितिका सदस्यद्वय नथुनी साह र नारायण यादवको नेतृत्वमा नियमित पठनपाठनमा बाधा नपुग्ने गरी प्रशासनिक कामकाज रोक्का गर्ने उद्देश्यले तालाबन्दी गरिएको जानकारी प्राप्त भएको छ ।
विद्यालयका प्राधानाध्यापक घुरन यादवका अनुसार विद्यालय व्यवस्थापन समितिको निर्णय अनुसार पछिल्लो १५ वर्षदेखि विद्यालयमा कार्यरत सिंहलाई काममा राखिएको हो ।
अध्यक्षले दिए पत्रकारलाई कार्यवाही गर्ने धम्की
लेखापालको नियुक्तिको विषय, विद्यालय व्यवस्थापन समितिको निर्णय र तालाबन्दीको बारेमा समाचार नलेख्न समितिका अध्यक्ष सन्तोषकुमार यादवले नयाँ पत्रीका राष्ट्रिय दैनिकका सिरहा सम्वादाता मणीलाल विश्वकर्मा लाई धम्की दिएका छन । समितिकै दुई जना सदस्यको अगुवाईमा असन्तुष्ट अभिभावकहरुले विद्यालय प्रशासनमा गरेको तालाबन्दीको बारेमा सोध्दा अध्यक्ष यादवले धम्क्याउँदै भने ‘तालाबन्दीको बारेमा सामाचार लेखे तपाईंलाई कारबाही गर्छु ।’
