मनोज बनैता, सिरहा, १३ जेठ । देशैभर निकै चर्चा कमाएका महेश चौधरी र संगिता कर्माचार्यलाई लाहान २३ मा भव्य स्वागत गरिएको छ । लकडाउनभरी राहत सामग्री वितरण गरिरहने चौधरी र कर्माचार्यलाई लाहान २३ गाढाका प्रमेश्वर साहु गुप्ता र उनकी पत्नी पार्वती देवीले भव्य स्वागत गरेका छन । यी जोडीको कार्यलाई उच्च सम्मान गर्दै खाजा खुवाई र खाँदा ओढाई सम्मान गरेका हुन । खाँदा स्वरुप मधेशका भेषभुषामा पर्ने ‘गमछा’ ओढाई स्वागत गरेका छन ।
राहत वितरण कै सिलसिलामा लाहानको गाढा गएको बेला प्रमेश्वर साहु र पार्वती देवीले चौधरी दम्पतीको कामलाई सराहना गर्दै उक्त सम्मान गरेका हुन । आफू मधेशवादी आस्था संग जोडिएको भएतापनी राम्रो काम गर्नेको उच्च मुल्यांकन हुनु पर्ने भन्दै पार्वती देवीले उनीहरुलाई खाजा खुवाई उत्तरोत्तर प्रगतिको लागि आशिर्वाद समेत दिएकी छिन ।
उता महेश चौधरीले साहु गुप्ता परिवार प्रति कृतज्ञता व्यक्त गर्दै भने ‘हामी प्रमेश्वर जी र पार्वती जी प्रति सदैव आभारी रहने छौँ । हामीलाई वहाँहरुको प्रोत्साहनले गर्दा अझ बढी हौसला बढेको छ । हामी अगामी दिनमा अझ नयाँ उर्जाको साथ समाजसेवामा प्रतिबद्ध हुने विश्वास दिलाउन चाहन्छौं ।’ साजसेवीलाई मान सम्मान गर्ने गुप्ता दम्पती नेपाल पत्रकार महासंघ सिरहा शाखाका अध्यक्ष दिनेश्वर प्र. गुप्ताका मातापिता हुनुहुन्छ ।
