सिरहा, २७ भदौ । ईलाका प्रहरी कार्यालय लाहानद्वारा खटाईएका घुमुवा प्रहरीमाथी सप्तरीको बलानबिहुल गाउँपालिकामा हातपात भएको छ। फरार अभियुक्त पक्राउ गर्न खटिएका घुमुवा प्रहरीले निर्दोषलाई हथकडी लगाउन खोज्दा झडप भएको स्थानियले बताएका छन । ५ जनाको संख्यामा गएको घुमुवा प्रहरी विरुद्ध सैयौ स्थानिय उभे पछि भागाभाग भएको बलान बिहुलमा पर्ने दिघियाका प्रत्यक्षदर्शी ले बताएका छन ।
भगवानपुर बाट बलान नदि पार गरि सप्तरीको दिघिया नजिक आई मल्हनिया र दिघियाका युवाहरुलाई पक्राउ गर्न खोजिएको दिघियावासी बताउँछन् । अवस्था तनावग्रस्त हुँदा ३ वटा मोटरसाइकलमा आएका जम्मा ५ जना घुमुवा प्रहरी मध्ये ३ जना त्यहाँबाट तत्कालै भागेका थिए भने २ जनालाई स्थानीयले समातेर नजिकको चन्ही स्थित चौकीमा बुझाएका छन ।
ईलाका प्रहरी कार्यालय कडरबोनाका प्रहरी निरीक्षक रामराजा प्रशाद केशरीले पक्राउ परेका प्रहरी घुमुवा ईप्रका लाहानको भनेर पुष्टि गरेका छन । उनले मान्छे चिन्न धोखा भएको हुन सक्ने प्रारम्भिक अनुमान भएको बताएका छन भने थप अनुसन्धान जारी रहेको स्पष्ट पारेका छन । निरिक्षक केशरीले पक्राउ परेका दुईजना घुमुवाको चाहिँ नाम सार्वजनिक गर्न चाहेनन् ।
