न्यूजमधेश डेस्क
झापा ,२९ चैत्र । देशकाे पूर्वी नाका मेचीनगरको विभिन्न स्थानमा तस्करी गतिविधि मौलाएको छ।
भन्सार छलेर नेपाल भित्रिएको लत्ताकपडा सहित दुई वटा गाडी नेकपा माओवादी केन्द्र निकट वाइसीएल कार्यकर्ताले नियन्त्रणमा लिएसँगै मेची नगरका नाकाहरूमा तस्करी गतिविधि बारे जानकारी भएकाे हाे।
काँकडभिट्टाबाट बिर्तामोड तर्फ जाँदै गरेको डब्लुबी ७४ पी १४५५ भारतीय नम्बर प्लेटको कार र को १ ज २४४० नम्बरको पिक अप गाडीमा भन्सार छलीका सामान आइरहेको विशेष सूचनाको आधारमा वाइसीएल बिर्तामोड नगर कमिटीले नियन्त्रणमा लिएको थियो।
नियन्त्रणमा लिएको गाडीमा थान कपडा भए पनि भन्सार प्रज्ञापन पत्रसहित आवश्यक कागजात फेला नपरेपछि थप अनुसन्धानका लागि वाइसीएल कार्यकर्ताले मंगलबार साँझ इलाका प्रहरी कार्यालय बिर्तामोडलाई जिम्मा लगाएका थिए।
सो गाडीमा ८ थान ठूलो रोलको थान कपडा, ३१ थान सानो रोल, ५ थान मोटर गार्ड, दुई बोरा कपडा, ३ बोरा मोटर पार्ट्स रहेको प्रहरी कार्यालय झापाका डिएसपी वसन्त पाठकले जानकारी दिए।
बरामद गरिएको सामान र दुई वटा गाडीको ४० लाख मूल्याङ्कन तोकेर आवश्यक कारबाहीका लागि आन्तरिक राजश्व कार्यालय इटहरी बुझाइसकेको डिएसपी पाठकले बताए।
त्यसैगरी नेपालबाट भारत लैजान खोजेका दुई सय केजी सुपारी प्रहरीले नियन्त्रणमा लिएको छ।
जिल्ला प्रहरी कार्यालय झापा र इलाका प्रहरी कार्यालय काँकडभिट्टाबाट खटिएका प्रहरी टोलीले मेचीनगर– ६ स्थित बुधबारेबाट काँकडभिट्टा हुँदै तिरिङखोला तर्फ सुपारी बोकेर जाँदै गरेको मे १ च ४९८० नम्बरको पिकअप गाडी मंगलबार दिउँसो नियन्त्रणमा लिएको थियो।
गाडीमा २९ बोरा अर्थात् दुई सय केजी सुपारी रहेको प्रहरीले जनाएको छ।
सुपारी बोकेको गाडीको भिसिटिएस र भ्याट बिल नभएपछि आवश्यक कारबाहीका चालक, सुपारी र गाडी आन्तरिक राजश्व कार्यालय इटहरी बुझाइसकेको डिएसपी पाठकले बताए।
सुपारीको ५ लाख ७० हजार र गाडीको १० लाख गरी १५ लाख ७० हजार मूल्याङ्कन तोकेर राजश्वमा बुझाइएको उनले बताए।
