कुलदिप दास
जनकपुरधाम,२२ फाल्गुण।धनुषाको क्षिरेश्वरनाथ नगरपालिका ३ स्थित राष्ट्रिय प्राथमिक विद्यालयको भवन निर्माणमा अनियमतता भइरहेको पाइरेको छ ।
भवन निर्माणका लागि नगरपालिकाले दुई वटा उपभोक्ता बनाएको हो । तर उपभोक्ताले कमिशन खाएर ठेकेदार मार्फत निर्माण गरिरहेको खुलेको छ । उपभोक्ताले स्वयंम ठेकेदार मार्फत भवन निर्माण भइरहेको स्वीकार गरेका छन् ।
सडक निर्माण गर्दा उक्त विद्यालय करिब एक वर्ष अगाडी भवन भत्काइयो । अहिले कक्षा कोठाको अभावमा चौरमा पठन पाठन भइरहेको छ । सोही कारण नगरपालिकाले सो विद्यालयभन्दा करिब ५ सय मिटर दक्षिण पूर्वमा नयाँ भवन निर्माण जारी छ ।
नयाँ भवनका लागि नगरपालिकाले ७५ लाख बजेट उपलब्ध गराएको छ । उक्त रकम मध्ये ४० लाखको एउटा र ३५ लाखको अर्को उपभोक्ता समिति बनाएको छ । ४० लाखको उपभोक्ता समितिका अध्यक्ष मो. रफिक छन् भने ३५ लाखको उपभोक्ता समतिका अध्यक्ष बेचन साहलाई बनाएको छ ।
उपभोक्ता समिति मार्फत काम हुनुपर्ने हो । तर उपभोक्ताले नै ठेक्का लगाएर गुणस्तरहीन भवन निर्माण धमाधम गरिरहेको पाइएको छ । उपभोक्ता समितिका अध्यक्ष बेचन साहले विरेन्द्रलाई ठेक्का दिएको स्वीकार गरे । तर अर्का उपभोक्ता समितिका अध्यक्ष मो. रफिकले विजय भन्ने ठेकेदार मार्फत काम गराइरहेको स्वीकार गरे ।
उपभोक्ता समितिका अध्यक्ष बेचनले नगरपालिका मार्फत नै ठेकेदारलाई काम दिएको र आफूहरुलाई नामको लागि उपभोक्ता बनाएको बताए । अर्को उपभोक्ताका अध्यक्ष मो. रफिकले आर्थिक अभावका कारण ठेकेदार मार्फत काम गराउन लागेको बताए ।
यता, विद्यालय व्यवस्थापन समितिका अध्यक्ष भोला यादबले सबै मिलेर भवन निर्माण गरिरहेको बताएका छन् । उनले ठेकेदार मार्फत काम भइरहेको कुरा अस्वीकार गरे । उनले जेठसम्ममा भवन निर्माण तयार हुने पनि बताए । ..
उपभोक्ता समिति मार्फत काम भइरहेको विषयमा भने नगरपालिका अनभिज्ञ छ । नगरपालिकाका निमित्त प्रमुख कार्यकारी अधिकृत उमेशलाल कर्णले उपभोक्ता समिति बनेकाले ठेकेदार मार्फत काम गराउन नपाउने बताए । उनले ठेकेदार मार्फत काम भइरहेको छ भन्ने कारबाही हुने समेत प्रतिवद्धता जनाए ।
