मनोज बनैता, सिरहा, २ बैशाख । मधेशमा आज जुडशितल पर्व मनाईदै छ । बैशाख २ गते मनाईने यस पर्वमा अभिभावक लगायत परिवारका पाको सदस्यले आफु भन्दा सानाहरुको शिरमा जल दिई आशीर्वाद दिने गर्छन ।
जुडशितल पर्वका दिन मधेशको हरेक घरमा सोहिजन को तरकारी, तरुवा, भुजुवा, आँप टिकुलाको चटनी वा तरुवा, झोरी, बरी, पापड लगायत विभिन्न व्यन्जनको खानेकुरा पाक्नेगर्छ । यस पर्वको दिन परिवारका साना सदस्यको शिरमा जल राख्नेलाई “जुराउने” भन्ने गरिन्छ । आजका दिन शिरमा जल राखी आशीर्वाद दिंदा वर्षभरी शितलता, शान्ति र समृद्धि आउने जनबिश्वास रहेको पाईन्छ ।
यतिबेला कोरोना भाइरसको महामारी विश्वभर फैलिएको छ । त्यसैले जुडशितलमा अग्रजले आफूभन्दा सानालाई कोरोना भाइरसबाट जोगाउने कामना गर्नेगरेका छन ।
आजका दिन रुखविरुवामा पानी हाल्नुको साथै खेतबारीमा मलजल गर्ने चौपाया (गाईवस्तु) नुहाउने समेत परम्परा रहेको छ । अत्याधिक गर्मी र सूर्यको तापबाट आकुल व्याकुल मानव लगायत रुखविरुवालाई शीतलता प्रदान होस भन्ने नै पर्वको मूल उद्देश्य रहेको छ ।
