मनोज बनैता, सप्तरी, ३१ बैशाख । सप्तरीको बलानबिहुल गा.पा ५ मा पर्ने कोदरकट्टी- रामनगरमा सशस्त्र प्रहरीले भारी मात्रामा तस्करी गर्नलागेका सामान बरामद गरेका छन । कोभीड -१९ महामारी को बेला पनि यस्ता तस्करी रामनगरमा दिनहुँ हुँदै गरेको स्थानीय बताउछन ।
चौकी नजिकै घर भएका एक स्थानीयले दिएको जानकारी अनुसार सोमबार राति तस्करी गर्न लागेका करिब २३ बोरा सुर्तीजन्य सामान सशस्त्र प्रहरी बेस क्याम्पद्वारा नियन्त्रणमा लिईएको हो ।
रामनगर सशस्त्र क्याम्पका ईन्चार्ज प्रहरी निरीक्षक केशब थापा ले भने ‘बोरा गन्न बाकि छ, त्यस्तै ९ बोरा सुर्तीजन्य, बिडी, डोरी लगायतका सामान होला । मैले खोलेर हेरेको छैन ।’ लकडाउनको कारणले अहिले सार्वजनिक नगरिने जानकारी ईन्सपेक्टर थापा ले दिए ।
प्रत्यक्षदर्शी स्थानीय र सशस्त्र ईन्सपेक्टर थापाले दिएको सुचनामा बोराको संख्या बाँझिएको छ । थापाले दिएको जानकारी अनुसार लगभग ९ बोरा छ भने स्थानीय अनुसार २३ बोरा समातिएका छन । जम्मा १४ बोराको फरक देखिएको छ । उता तस्कर सामान छुटाउन राजबिराज सम्म दौडधुपमा लागेको पनि सूचना प्राप्त भएको छ।
दिनहुँजसो हुँदैगरेको तस्करीले गर्दा बलानबिहुल गा.पा संक्रमणको खतरामा रहेको स्थानीय महेश साह बताउँछन् । उनको अनुसार केहि तस्करी त दिन दहाडै हुनेगरेको छ भने केही राति । दिन दहाडै हुने गरेको तस्करीमा तस्कर र सशस्त्र बिच सेटिङ हुनसक्ने स्थानीयको आशंका रहेको छ ।
