मनोज बनैता, सिरहा, ३१ बैशाख । बोदे बरसाईन नगरपालिका वडा.१ का अध्यक्ष धिरेन्द्र यादवले मनमौजी रुपमा राति ९:०० बजे आफन्त लगायत आफ्ना आसेपासेलाई सुटुक्क राहत दिएको व्यापक जनगुनासो रहेको छ । बैधानिक प्रक्रियालाई लतमर्दन गर्दै रातारात बाँडिएको राहतको बिषय लिएर धनगढी लगायत वडा १ मा पर्ने गाउँमा अध्यक्ष यादवको घोर बिरोध भएको छ । अध्यक्षको मनपरी भन्दै स्थानियले धिरेन्द्र यादवलाई कार्यवाहीको माग गरेका छन ।
स्थानीय युवा धर्म देव साहको प्रश्न छ ” राति ९:०० बजे आफ्नो आसेपासेलाई वडा कार्यालयमा बोलाई राहत सामग्री दिएका छन। यस्तो अनैतिक कार्यमा संलग्न जनप्रतिनिधिलाई कारबाही भएन भने बिपन्न तथा पीडित जनता कति दिन सम्म यस्तो असह्निय कार्यमा चुप लागेर बस्छ्न?”
साहले बोदे बरसाईन नगरपालिका का मेयर र प्रशासकिय अधिकृत समेतलाई जानकारी गराएको भनेका छन । नगरपालिकाले ४०० प्याकेट राहत सामग्री पठाइएकोमा वडा अध्यक्षले कुनै पनि पार्टीको प्रतिनिधि नबोलाइ आफ्नो मनोमानी ढंगले वितरण गरेको साथै मिति २०७६/१/२९ गते राती करिब ९:००बजेको समयमा बिक्रीवितरण गरि आम बिपन्न/गरिब/दलित/श्रमिक जनतालाई राहतबाट बन्चित गरेको आरोप छ । यसरी सरकार द्वारा पीडितलाई दिएको खाद्यान्न लुकीछिपी बिक्री गर्नुले जनप्रतिनिधिको नैतिकता माथि ठूलो प्रश्न चिन्ह खडा गरेको छ । उता वडा अध्यक्षलाई बारम्बार प्रयास गरेपनि सम्पर्क हुन सकेको छैन ।
