मनोज बनैता
सिरहा, २ जेष्ठ । लाहान स्थित रा.उ स्मारक अस्पताललाई कोरोना अस्पताल बनाउने प्रदेश – २ सरकारको निर्णयलाई गलत भन्दै लाहानका स्थानीयले घोर बिरोध गरेका छन । अस्पतालको वरिपरि घना बस्ती रहेको ले सम्भावित खतरा हुन सक्ने भन्दै लाहानका युवाहरूले प्रदेश सरकारको यो निर्णयविरुद्ध अस्पताल कै परिसरमा पत्रकार भेला गरेका थिए ।
जनता समाजवादी पार्टीका युवा नेता ललित नारायण महतो ले भने ‘प्रदेश सरकार ले रा.उ स्मारक अस्पताललाई कोरोना उपचार गरिने केन्द्र बनाँउदा यहाँका वासीहरु संक्रमीत हुने खतरा बढी छ । घना बस्ती भएको ठाउँ छोडी बलान पुल नजिकै रहेको कभर्ड हलमा उपचार केन्द्र बनाउन महतोले प्रदेश सरकारलाई आग्रह गरे ।’
त्यसैगरी लाहान -३ निवासी निर्वाचित महिला सदस्य नगिना देवी पासमान ले भनिन “सरकारले गरेको यो निर्णय सरासर गलत हो । यस अस्पताललाई कोरोना उपचार केन्द्र बनाए पछि गरिब बिपन्नले आखिर आफ्नो उपचार गराउन कहाँ जाने? उनको भनाई छ “गर्मीसँगै सर्प दंशका घटनाहरु समान्य छन यहाँ । यदि त्यस्तो घटना भयो भने आखिर हामी कहाँ जाने? हाल सम्म यहि अस्पतालमा कम खर्चमा हामी प्रसुती सेवा लिईरहेको अवस्था छ । भोलि गएर हामी जस्ता गरिब बिपन्नहरुको अवस्था के रहला?”
अर्का युवा नेता मनोज यादव (मन्जे) ले प्रदेश सरकारले लिएको यो निर्णय खारेजीको माग गरेका छन । उनले भने “कोरोना अस्पताल नै बनाउनु छ भने बस्तीबाट टाढा रहेको जे.एस क्यामपसमा बनाउनु पर्छ ।”
त्यसैगरी अर्का युवा भोलाजित नेपालले सरकारको यो निर्णयलाई आत्मघाती निर्णयको संज्ञा दिएको छ । नेपालले प्रश्न गरे ‘प्रदेश सरकारले कुन हिसाबले यस अस्पताललाई कोरोना उपचारको लागि चयन गर्यो ? उनले बरु धनगढी माई नगरपालिका छपराडी स्थित महेन्द्र गेनाई महतो अस्पतालमा केन्द्र राख्न सरकार समक्ष आग्रह गरे । नेपालको अनुसार छपराडी स्थित यो अस्पताल मानवीय वस्ती भन्दा निकै टाढा रहेको ले उपयुक्त हुने दावी गरे ।
