मनोज बनैता
सिरहा ,२ जेठ । कोरोनाको संक्रमण देखिए लगत्तै अत्यधिक कडाई गरिएका धनुषा जिल्लामा भने केहि जनप्रतिनिधिले लकडाउनको धज्जी उडाएको खबर छ ।
धनुषाको शहीद नगरपालिका वडा नम्बर ८ का जनप्रतिनिधिले शुक्रबार बालबालिकालाई बोलाई पुस्तक बाँडेका छन । उपस्थित करिब २०० छात्रछात्रा संग न मास्क देखियो न समाजिक दुरी नै ।
आधारभूत विद्यालय डुमरियामा भेला भएका बालबालिकाले भने “हामीलाई सरले किताब लिन बोलाउनु भएको हो ।” त्यहाँ उपस्थित शिक्षक पवन गोहितमान यादवलाई सोधपुछ गर्दा उनी प्रधानाध्यापक अशोक यादव र स्रोत ब्यक्तिको आदेशमा किताब बाँडेको भने ।
प्रधानाध्यापक यादव संग सम्पर्क गर्दा उनी नगरपालिकाको दवाबमा किताब वितरण गर्न थालेको भन्दै आफ्नो सफाई दिए ।बुझ्दै जाँदा शहीद नगरपालिका भरी अधिकांश विद्यालयले शुक्रबार पाठ्यपुस्तक वितरण गरेको थाहा पाईयो ।
वडा नम्बर ८ कै आधारभूत विद्यालय नाथपट्टीमा पुस्तक वितरण गर्न वडा अध्यक्ष तनुकलाल स्वयं उपस्तिथ भएको स्रोतले जनाए ।
कोभीड १९ महामारी को त्रास झेलीरहेको देशमा यस्ता अनुत्तरदायी जनप्रतिनिधि को कारण संक्रमण को खतरा बढ्ने स्थानीयको भनाई छ ।
