मनोज बनैता, लहान २३ जेठ । कोरोना (कोभिड– १९) महामारीको कारणले नेपालमा लकडाउनको करिब ३ महिना पुग्न लाग्दा पनि म.स जोडीले आफ्नो अभियानलाई पुर्णविराम दिएको छैन । लकडाउनको पहिलो साता देखि नै शुरूवात गरिएको खाद्यान्न बितरण महेश चौधरी र संगिता कर्माचार्यको जोडीले जारी राखेका छन ।
अमेरिका र अस्ट्रेलियामा बसेका आफ्ना छोरा छोराछोरीको आर्थिक सहयोगको भरमा शुरुगरेको यस अभियानमा हाल यी जोडीका निकटतम साथीहरूले पनि सहयोग गरिरहेको सुचना प्राप्त भएको छ । यी जोडी को काम देखि विभिन्न पार्टीका कतिपय नेताकार्यकर्ता असाध्यै प्रभावित बनेका छन भने कतिपय यी जोडी देखि राजनैतिक रुपमा तर्सिएको पनि अवस्था रहेको छ । असन्तुष्ट राजनैतिक खेलाडीहरुको लागि यिनीहरू अाँखाको कसिङ्गर बन्दै गएको केही बुद्धिजीवी बताउछन । उता जोडी द्वयलाई सोध्दा आफू राजनीति भन्दा पनि समाजसेवामा रुचि राख्ने बताउँछन् ।
चिया पसल देखि नगरका टोल– टोल लगायत प्रदेश नम्बर – २ भरी यि जोडीको चर्चाले लाहानको स्थानीय नेताहरुबिच तरङ्ग पैदा गरेको छ । केहि स्थानीय नेताहरू त यीनको आलोचनामै दिन खर्चिरहेको अवस्था छ ।
बिपत्तीमा परेको मानबलाई सेवा गर्नु नै धर्म हो भन्ने मुख्य उदेश्यका साथ यिनीहरुको दिनचर्या लक्षित बर्ग समुदायको चुल्हो बाल्नमा प्रतिदिन बित्ने गरेको उनका नजिकका मित्र जय प्रकाश गुप्ताले बताए ।करिब २ सय ५० क्विन्टल चामल, नुन , तेल , सोयाबिन लगायतका खाध्यान्न सामग्री हाल सम्म बितरण गरिसकेको सामाजिक अभियन्ता महेश चौधरीले बताए ।
त्यसैगरी मनकारी साथी भाईको सहयोगले सामाजिक काम गरिरहेको भन्दै बिपन्न परिबार अन्तर्गत एकल महिला , असहाय , कुल्ली , मजदुर लगायतलाई राहत बितरण गरिरहेको उनका श्रीमती संगिता कर्माचार्यले बताईन ।
