मनोज बनैता, सिरहा, २४ जेठ । नेपालमा राष्ट्रवादको नाममा नश्लवादको खेती भईरहेको नेकपा नेता मातृका प्रसाद यादवले बताएका छन । शिर्ष बामपंथी नेता यादवले आफ्नो समाजिक संजालको पेजबाट संसदमा जसपा नेतृ माननीय सरिता गिरी प्रति उग्ररूपमा प्रस्तुत भएकी माननीय गंगा चौधरीलाई अंकित गर्दै एक अर्काको भाषिक र समाजिक अस्तित्व स्विकार गर्न सुझाव समेत दिएका छन ।
नेता यादवको अनुसार विचारको विमति हुँदैमा जनप्रतिनिधिलाई संसदमै “भारतीय चेली”को संज्ञा दिएर नस्लीय अभिव्यक्ति दिनु मण्डले राष्ट्रवादको पोषण गर्नु हो । उनले भने कि “वैवाहिक भए पनि नेपालको नागरिकता प्राप्त गरेका व्यक्तिलाई अरू नागरिक सरह बोल्ने र विचार अभिव्यक्त गर्न सम्पूर्ण अधिकार छ र नेपालको संविधानको मर्म नै त्यही हो ।”
नेता यादवले लेखेका छन कि “संकुचित राष्ट्रवादको समस्या विश्वभरि फैलिएको छ तर नेपाल जस्तो सानो मुलुकमा यस संकुचित राष्ट्रवादको नकारात्मक असर अझ गहिरो हुनेछ । नेपालको विविधतालाई नारामा मात्र सिमित गर्ने प्रयत्नलाई जडै देखि उखाल्न आवश्यक छ । यस्ता अभिव्यक्तिले समाजलाई फुट तिर उन्मुख गर्ने सम्भावना बढी छ ।”
एक अर्काको भेष-भाषा र कला-संस्कृतिको सम्मान नगरी राष्ट्रीय एकता बलियो पार्न सकिन्न भन्ने नेता यादवले स्पष्ट पारे ।
