रासिन्द्र यादव, सप्तरी, २६ जेठ । लकडाउनमा केही ब्यापारीहरुको मनपरीले गर्दा कालोबजारीको अवस्था कहालीलाग्दो छ। धान रोपने बेला मलखादको कालोबजारीले बलानबिहुल गाउपालिकाका किसान मारमा परेका छन । २१ सय पछत्तर रुपैयाँ ५० पैसा पर्ने मलमा अधिकतम १०० रुपैया लोडअनलोड जोडी लिन सकिने डिएपी मल बलानबिहुल स्थित पसलहरुमा २८ सय देखि ३५ सय सम्म बिक्रीवितरण गर्दैगरेको व्यापक गुनासो आउन थालेको छ । हल्का वर्षा पछि उत्साहित भएका किसानलाई खेत रोप्न सास्ती भोग्न बाध्य बनाईएको छ ।
बलानबिहुल गा.पा १ का किसान बिन्दी यादवको अनुसार उनले २७ सय पचासमा चन्हीचौकको गया प्रसाद गुप्ताको पसलबाट किनेका छन । यादवले भने ‘मलखादको कृतिम अभाव सृजना गरिएको छ । लकडाउनको बहानामा कालोबजारी बढ्दो छ । गाउपालिका को बजारमा एक त मल पाउदैन पाए पनि उच्च मुल्य तिरी किसानले किन्नुपर्ने बाध्यता छ ।’
त्यसैगरी उक्त गा.पा २ बस्ने रामपुकार मण्डलले पनि गया प्रसादकै पसलबाट २९ सयमा किनेका छन । मण्डल ले भने ‘मलाई साहुजी ले ३ हजारमा बेच्छु तर तिमीलाई २९ सयमा दिन्छु ।’ त्यस्तै गा.पा १ कै रामबिहारी यादवले पनि त्यही पसलबाट २८ सयमा किनेको बताएका छन । मल्हनियाका एक युवा नाम नबताउने शर्तमा भने कि उनले त्यही पसलबाट ३ हजार तिरी एक बोरा ल्याए ।
विभिन्न कृषि सहकारीबाट लगभग २२ सय मा खाद ल्याई चन्हीको केहि पसलहरुमा २७ देखि ३५ सय सम्ममा बिक्रि बितरण भईरहेको ब्यापक गुनासो आएतापनी सरोकारवाला निकाय मौन देखिनुले स्थानीय नेता रामेश्वर यादव, अगिन्धर यादव, धनबिर यादव, घुरण मुखिया, जुरीलाल यादव, कारी चौधरी, राजकुमार यादव लगायतले आक्रोस ब्यक्त गरेका छन ।
