मनोज बनैता
सप्तरी, २ अषाढ । सप्तरीको बलान बिहुल गाउँपालिका स्थित चन्ही चौकीले सोमबार भारी मात्रामा मदिरा बरामद गरेपनि भोलिपल्टै चेतावनी दिएर छोडेको छ । विषेश सुचनाको आधारमा प्रदेश प्रहरी र चन्ही चौकीका प्रहरी मिलेर एउटा नम्बर प्लेट नभएको ट्र्याक्टर चेकजाँच गर्दा सिमेन्ट, छड, भुजा, च्युरा संगै लुकाएर राखेका भारी मात्रामा मदिरा बरामद गरेका थिए ।
मदिरा संगै नियन्त्रणमा लिईएको चालक र गाडी भने मंगलवार छोडिएको छ । ईलाका प्रहरी कार्यालय कडरबोनाका प्रहरी निरिक्षक रामराजा केशरीका अनुसार मदिरा खरिदगरेको भ्याट बिल र गाडीको कागजात दिएपछि चालक र ब्यापारीलाई छोडिएको हो । उनले भने ‘नम्बर प्लेट नभएको गाडीको जरिवाना तिरेर ल्याएपछि हामीले गाडी छोडनु पर्यो ।’ प्र.नि. केशरी ले थप्दै भने ‘मदिरा ती ब्यापारीले स्टोर गर्ने हिसाबले लगेको प्रमाणित भयो तस्करी गर्नलाई होईन किनकि उनले आफ्नो पसलको कागजात समेत देखाए ।’ उनको अनुसार मदिरामा जम्मा १० कार्टुन कस्तुरी र १ कार्टुन गोल्डेन ओके रहेको थियो ।
गाडी नियन्त्रणमा लिएको १२ घण्टा पछि भ्याट बिल पेश हुनु, बिना नम्बर प्लेटको गाडी को चलान काटिनु, चेतावनी दिएर छोडेको कुरा प्रहरीबाट आउनु आदिले स्थानियवासी प्रहरीको काम गर्ने शैली प्रति सशंकित छन । चन्हीका केही युवाले राजनैतिक पहुँचको अधारमा ट्रयाक्टर सहित सामान छुटेको दावी समेत गर्छन । स्थानीय एक युवा पुस्पराज भने अलमलमा परेका छन । उनी समाजिक संजालमा लेख्छन ‘नेपाल कमजोर कि नेपालको प्रशासन ? दुई दिन चौकी अगाडी थन्केको गाडी भन्सार गयो कि गाडी धनी को घरतिर बुझ्नै सकिएन ।’ लकडाउनको बेला मदिरा ओसारपसार तथा खरिदबिक्री बन्देज रहेतापनी बलानबिहुल गाउँपालिकामा भने यसलाई सहजरुपमा लिईएको छ ।
