मनोज बनैता
लाहान, ४ अषाढ । चुनावको बेला वडा ७ लाई डिजिटल वार्ड बनाउने सपना बाँडेका उक्त वडाका वडा अध्यक्ष राकेश रोशन गुप्ताले बिकास निर्माणकार्य पछि डिजिटल प्रविधि जडान गर्न तर्फ उन्मुख भएको छ । वार्डलाई वाईफाई जोन तथा सिसिटिभीको निगरानीमा राख्ने उदेश्य बोकेको अध्यक्ष गुप्ताले डिजिटलाईजेशन कार्य शुरु भईसकेको बताएका छन ।
तत्कालीन संघिय समाजवादी फोरमबाट निर्वाचित वडा अध्यक्ष गुप्ताले चोरी-पैठारी, सडक दुर्घटना लगायतका सुरक्षा ब्यवस्थालाई दुरुस्त राख्नका साथ साथै अत्याधुनिक प्रविधिसम्म जन जनको पहुँच स्थापित गर्न सो कार्य थालेको जनाएका छन । उनले वाईफाई समेत सबैठाउँमा पुर्याईने दावी गरे ।
समाजवादी पार्टीका जिल्ला उपाध्यक्ष समेत रहेका गुप्ता एक कुशल समालोचक तथा मधेशका चिन्तकका रुपमा समेत चिनिएका छन । कलिलो उमेर देखि नै मधेशवाद प्रति आकर्षित नेता गुप्ताले यो त केवल शुरूवात हो वार्डको लागि अझै धेरै गर्नुपर्ने बताएका छन । उनले डिजिटल वडा अभियान वार्डकै बजेटमा भईरहेको समेत जानकारी दिएका छन ।
