मनोज बनैता
सिरहा, ५ असार । सिरहा जिल्ला लागू औषधको हटस्पट बन्न लागेको यहाँका स्थानियको गुनासो छ । हप्तै पिच्छे सिरहा प्रहरीले लागू औषध कारोबारीलाई समात्दा पनि तस्करी रोकिएको छैन । बिहीवार सिरहाको भगवानपुर गाउँपालिकाबाट ठूलो परिमाणमा लागू औषध सहित दुई जनालाई प्रहरीले नियन्त्रणमा लिएको छ ।
ईलाका प्रहरी कार्यालय लहान र प्रदेश नं. २ प्रहरी कार्यालय जनकपुरबाट खटिएको संयुक्त गस्ती टोलीले भगवानपुर गाउँपालिका–३ स्थित अभ्यनगरमा चेक जाँच गर्ने क्रममा भारतबाट नेपाल आउँदै गरेको सोही वडाका २१ वर्षिय वलि यादव र भारत मधुबनी ललमनिया ग्राम पंञ्चयात बस्ने २० वर्षिय छोटु कुमार यादवलाई प्रहरीले पक्राउ गरेको जानकारी प्राप्त भएको छ ।
पक्राउ परेकाहरू बाट डाईलेक्स डिसी १०० डिसीको ७० बोतल, नर्फिन ३० एम्पुल, फेनारगन ३० एम्पुल, डाइजील्याव ३० एम्पुललगायतका ड्रग्स बरामद भएको प्रहरीले जनाएको छ । नियन्त्रणमा लिईएका दुबै जनालाई आवश्यक कारवाहीको लागि ईलाका प्रहरी कार्यालय लहानमा ल्याईएको स्रोतले खुलाए ।जिल्ला प्रहरी कार्यालय सिरहाका डिएसपी तथा सूचना अधिकारी विनोद घिमिरे अनुसार थप अनुसन्धान जारी छ ।
