मनोज बनैता
सप्तरी, ८ असार । सप्तरीको सुरुङ्गा नगरपालिकामा एक युवक किसानलाई ज्यान मार्ने प्रयास भएको छ । सुरुङ्गा ४ स्थित कदमाहा बस्ने करिब २९ वर्षिय ओम मण्डललाई त्यहीँका ७ जना स्थानिय युवाहरुको समुहले ज्यानमार्ने प्रयास गरेको छ । कृषक मण्डललाई अपहरण शैलीमा गाउँबाट करिब एक किलोमीटर पर खेतमा लागि ज्यान मार्ने प्रयास गर्ने ती उदण्ड युवासमूह हाल फरार रहेको प्रहरी स्रोतको भनाई छ ।
पिडित परिवारको अनुसार मण्डललाई विहिबार राती ११बजे त्यहि गाँउका २१ वर्षिय ऋषि देव सिंहले खुला चौरमा शौच गर्न बोलाएर लगेका थिए । घरबाट निस्केका ओम प्रकाशलाई बाटोमा आदित्य चौधरी, रञ्जित ठाकुर, प्रभु चौधरी, भगवानदेव चौधरी, मुकेश चौधरी, रमेश चौधरी लगायतका युवाहरू लागू औषध सेवन गरि एक्कासि आई मण्डलको मुख छोपी लगेका थिए । गाउँबाट करिब एक किलोमीटर दक्षिण -पश्चिमको दिशामा लागि मण्डललाई निर्मम रुपमा कुटेका थिए । सातै जना युवाहरूको कुटाई बाट अचेत अवस्थामा पुगेका मण्डल मरेको भन्दै ती युवा समूह त्यहीँबाट फरार भएका थिए । उता घाईते मण्डल केही घण्टा पश्चात् होसमा आई निवस्त्र घर पुगेका थिए ।
स्थानियले खबर पाए लगत्तै घाईते मण्डललाई सप्तऋषि अस्पतालमा पुर्याएको थियो । स्वास्थमा खासै सुधार नआएपछी घाईते मण्डललाई बिराटनगरको न्युरो अस्पतालमा लगिएको थियो । उपचार गराई फर्केका मण्डल अझैसम्म आँखा खोलेका छैनन । यसरी मधेशमा दिन दिनै लागू औषध प्रयोग गर्ने युवाहरूको संख्या डरलाग्दो रुपमा बढ्दो छ जसले यस्ता घटनाहरुलाई निम्त्याएको छ ।
पीडित मण्डलका पिता लक्ष्मी मण्डलले फरार रहेका युवाहरु माथी कडा कार्यवाहीको लागि ईलाका प्रहरी कार्यालय कडरबोनामा उजुरी दिएका छन । प्रहरी निरीक्षक रामराजा केशरीले घटनाको छानबिन भईरहेको जनाएको छ ।
