न्यूजमधेश सम्बादाता
भैरहवा, १५ असार । नेकपा नेतृत्वको संघीय सरकारले ल्याउन लागेको ७ बर्षपछि अंगीकृत नागरिकता दिने प्रावधानबिरुद्व डा. सिके राउत नेतृत्वको जनमत पार्टी रुपन्देहीद्वारा सोमबार भैरहवामा विरोध प्रदर्शन गरेको छ ।
जिल्लाको सिद्धार्थनगर नगरपालिका वडा नम्बर ४ स्थित श्री राम जानकी हनुमान मन्दिरबाट सुरु भएको विरोध र्याली नगरका विभिन्न स्थान हुँदै मिलनचोकमा कोणसभामा परिणत भएको पार्टीका रुपन्देही जिल्ला इञ्चार्ज रामकेश गुप्ताले बताए ।
विरोध र्यालीमा सहभागिहरुले नागरिकता संशोधन विधेयक खारेज गर, कम्युनिष्ट सरकार मुर्दावाद, नागरिकताबाट वञ्चित गर्न पाइंदैन लगायतका नारा लगाएका थिए ।
कोणसभालाई सम्बोधन गर्दै जनमत पार्टीका केन्द्रीय सदस्य भोपेन्द्र यादवले सरकारले मधेशी जनतालाई नागरिकताबाट वञ्चित गर्न खोजेको बताए । उनले अहिलेको समयमा पनि नागरिकता पाउनुपर्छ भनेर आवाज उठाउनुपर्ने स्थिति बाध्यतावशः भएको बताए ।
कोणसभामा पार्टीका नेताहरु दिलिप यादव, चन्द्रशेखर सोनार, संजय कुमार मिश्र, विकास प्रसाद लोध, निधिलाल लगायतले बोल्दै नागरिकता संशोधन विधेयक खारेज नगरिए सशक्त आन्दोलनमा उत्रिने चेतावनी दिए । शिवचरण केवटको सञ्चालनमा कार्यक्रम सम्पन्न भएको थियो ।
