मनोज बनैता
लाहान, ३१ असार । सोमबार सिरहामा बसेको नेपाल पत्रकार महासंघ सिरहा शाखा कार्यसमितिको बैठक भव्यताकोसाथ सम्पन्न भएको छ । सिरहा शाखाको अध्यक्ष दिनेश्वर प्रसाद गुप्ताको अध्यक्षता र केन्द्रिय सदस्य देबकुमार यादबको प्रमुख आतिथ्यमा सिरहा सदरमुकामको जिल्ला शाखामा बसेको उक्त बैठकले पत्रकारको हकहितलाई ध्यानमा राखी विभिन्न निर्णयहरु सार्वजनिक गरेको छ ।
बैठकले शाखाका साधारण सदस्य रहेको गोपाल गुप्ता (रौनियार) लाई कार्यवाही समेत गरेको छ । गुप्ता विरुद्ध धेरै गुनासोका उजुरी परेको हुनाले उनीमाथि कार्यवाही गरिएको भनिएको छ । पत्रकारिताको आडमा जग्गा कारोबार लगायत अन्य अबैधानिक गतिविधिमा लागेको आधारमा गुप्तालाई सात दिने स्पस्टिकरण माग गरिएको शाखा अध्यक्ष दिनेश्वर प्रशाद गुप्ताले जानकारी गराए । यस अघि गुप्तालाई प्रेस मञ्च नेपालको सिरहा शाखाले समेत साधारण सदस्य समेत नरहने गरि निलम्बन गरेको प्रेस मञ्च सिरहाका कार्यकारी अध्यक्ष महेश सिंह महतोले जानकारी दिए । उनी माथि पत्रकारिताको नाममा विभिन्न नाजायज काम गर्दै गरेको आरोप लाग्दै गरेको प्रेस मञ्चका केन्द्रिय सचिब बिरेन्द्र यादवले जनाएका छन ।
महासंघले जिल्लाका पत्रकारहरुको सीप र क्षमता अभिबृद्धी गर्न जिल्लाका १७ वटै स्थानिय तह लगायत सरोकारबाला संग समन्वय गरी माहासंघको आयोजनामा तालिम संञ्चालन गर्नको लागी स्थानिय तहहरुमा प्रस्ताब पेश गर्ने निर्णय गरेको छ । त्यसैगरी जिल्लाका बिभिन्न मिडियाहरुमा प्रसारित , प्रकाशित बिज्ञापनमा एकरुपता ल्याउनका लागी जिल्लाका स्थानिय तहको प्रमुख लगायत सरोकारबालाहरु संग एक दिने अभिमुखिकरण तथा अन्तरक्रिया गर्ने समेत निर्णय गरेको छ ।
जिल्लाको कार्यसमिति संग समन्वय गरेर जिल्ला शाखामा आबद्ध महासंघको सदस्यहरुले साउन महिनाको अन्तिम सम्ममा अनिबार्य सदस्यता नबिकरण गर्नुपर्ने, नबिकरण शुल्क महासंघको राष्ट्रिय बाणिज्य बैंकको खातामा जम्मा गर्ने , भौचर महासंघमा पेश गर्ने लगायतका निर्णय गरिएको स्रोतले बताएको छ ।
सिरहाको बिष्णुपुर गाउँपालिकामा महासंघको भवन निर्माण गर्नका लागी गाउँपालिका अध्यक्ष जागेश्वर यादबको बिशेष सहयोगमा करिब डेढ कठ्ठा ऐलानी जग्गा दिएको साथै आगामी आर्थिक बर्षमा भवन निर्माण गर्न गाउँसभा बाट ५ लाख रकम बिनियोजन गरेकोले जिल्ला शाखाले गाउँपालिकालाई धन्यबाद दिने लगायतको निर्णय गरेको महासंघले जनाएको छ ।
