मनोज बनैता
सिरहा, ११ श्रावण । मिर्चैया – ३ का वडा अध्यक्ष हरि कुशियैत यादवमाथी काखा पाखा गरेको आरोप लागेको छ । मिर्चैया ३ स्थित राघोपुरका करिब ६० घर द्लित समुदायले अध्यक्ष यादव माथी बेईमानी गरेको आरोप लगाएका छन । स्थानीय सरकार र प्रदेश सरकारबाट उपलब्ध विभिन्न योजनाहरु आफ्नै गाउँमा लागू गरि आफुहरुलाई उक्त सेवाबाट बन्चित गरेको भन्दै स्थानीय राघोपुरबासीले बिरोध गरेका छन ।
सभासद राजकिशोर यादवद्वारा उपलब्ध गराईएको १९ लाखको घर छाउने पाता, डिप बोरिङ ४ थान, नगर र प्रदेश गरि २.५ लाखको कोरोना कोष, किसानको लागि मल/बीउ, नगरपालिका द्वारा दिईएको कुट्टी काट्ने मेसिन ४ थानलगायतका सुविधा बाट बन्चित भएपछि राघोपुरका दलितहरू आन्दोलित भएका हुन ।
स्थानिय हरिलाल पासमानको अनुसार वडा अध्यक्ष यादव दबङ्गगिरी देखाउदै आफ्नालाई बोलाई बोलाई सुविधा दिएको र दलितलाई पाखा लगाएको भन्दै आक्रोश पोखेका छन ।
घर छाउने पाताको लागि राघोपुरबासी ले करिब तीन महिना देखि योजना संचालन गर्न माग गर्दै आएका छन । दलितहरुले असार १८ गते वडा कार्यालयमा तालाबन्दी समेत गरेका थिए । वडा अध्यक्ष यादवले श्रावण ४ गते तालाबन्दी खोल्ने प्रयास गर्दा झडप भएको थियो जसमा करिब आधा दर्जन दलितहरु घाईते भएका थिए । विवादको क्रममा वडा अध्यक्ष यादव, किशोर यादव लगायतले उमेश सदाय, रुपेश सदाय, मरनी देवी सदाय, डोमीनी देवी सदाय सहित ६ जनालाई कुटपिट गरिएको थियो । कुटपिटमा उमेश सदायको टाउकोमा गम्भीर चोट लागेको थियो ।
